I heisse euch ganz herzlich wilkomme und freue mi sehr, euch dr Jahresbricht vom 2021 dasmal wieder persönlich dörfe vorzträge.
Z letschte Jahr isch no einisch sehr prägt worde vo Corona und de troffnige Massnahme. Ufgrund desse si üsi Vereinsaktivitäte im erschte Quartal recht igschränkt gsi. Woni da de Jahresbricht ha gschriebe, isch mer abr ufgfalle, dass mer im Rescht vom Jahr derfür ordentlich hei ufgholt.
D Wintertrainings, wo scho vor dr letschte HV si gstartet, hei mir aber dr ganz Winter lang dörfe düreführe.
Einersits hei mir a de Fritige üse bliebt Dressurkurs mit dr Florence Poljak dörfe abiete. Sie hett wie geng nid nume z Ross, sondern au dr Riter bewegigstechnisch ordentlich gforderet.
A de Samschtige hett z Gymnastiktraining bim Samuel Bettschen stattgfunde. Au de Kurs isch wie immer guet bsuecht gsi und vieli Riter hei ihre Ross damit uf die kommendi Saison vorbereitet.
Beidi Kürs hei z Rumendinge uf dr Alag vom Fritz Schneeberger chönne durchgführt werde.
D Hauptversammlig vom letschte Jahr hei mir ebe ufgrund vo de geltende Coronamassnahme nume per Briefwahl chönne dürführe. Dahingehend sind all Traktande und Vorschläg agno worde.
Am 12. April isch z Migros Projekt Support your Sport beendet worde und mir hei 159,85 CHF für d Vereinskasse chönne erkämpfe. Mercii nomau euch aune fürs fliessige Guetschii sammle.
Am 24. April hei mir endlich mit dr erste richtige Vereinsaktivität vom neue Jahr dörfe Starte. A dem wunderschöne u sehr warme Früheligstag hei mir üs all ufem Grassbitz näbem Aldi troffe UND üse eiget Vereinsplatz chönne irichte. D ganz Verein hett fliessig mit apackt und das bitzli Land ine coole Trainingsplatz verwandlet. Unter anderem hei mir z ganze Material zum Platz here bracht, d Container, wo üses Hindernissmaterial glageret wird, neu agstriche, Züün baut und nebebi e tolli gmeinschaftlechi Zit verbracht. A dem Tag isch nid nume viel glachet worde, mir si au mit feine Getränk u Snacks verwöhnt worde. Bsundersch gfreut hett üs, dass so viel vo de neue Mitglieder si awesend gsi und mir sie im Rahme vo dem Projekt endli all persönlich hend dörfe wilkomme heisse.
Am nächschte Tag hett scho die nächscht Vereinsaktivität uf üs gwartet. De erscht Sunntigsritt vom Jahr hett dank dr Terasseöffnige chönne durgführt werde. So hei mir üs am 25. April im Rudwilbad troffe und nomal gebührend, wenn au chli verspätet, ufs neue Jahr chönne astosse.
Mitti Mai si d Vereinskurse vom Summerquartal gstartet, nämlich e Springkurs mitem Samuel Bettschen und eme Gymnastik Kurs mit sim Sohn, am Pascal Bettschen. Beid Kürs si guet bsuecht gsi. Abr z grosse Highlight isch derbi natürlech gsi, dass mir die Kürs uf üsem eigete Vereinsplatz ufeme tolle Grassbode hei dörfe dureführe. Dür die Bodeverhältnis si d Ross natürlech de au gad optimal uf dr Concours Burgdorf vorbereitet worde.
Am 18. Juli hett ZKV Vereinscupausscheidung uf dr Alag z Roggwil stattgfunde, durchgführt worde isch si düre Ritverein vo Utzenstorf. Üse Equipe bestehend us:
Lara Spross Caline S CH
Matthias Kunz Inschi vom Ulmehof CH
Christine Wampfler Cadiz D’Aveline CH
Sie hei dr 2. Platz chönn erringe und sech somit füre Final z Lenzburg qualifiziert.
Am 27. Juli hett Geländetraining Numero 1 stattgfunde, erstmalig z Avenches und erschtmalig mit dr Myriam Lobsiger und dr Kuki Schärer. Es isch es sehr es lehrrichs und fordernds Training für Pferd und Reiter gsi. Bsudersch toll hett üs tüecht, hei die beide sogar es Lehrpferd mitgno, wo i dr Istigergruppe über neui Hinderniss hett vorus chönne laufe. Trotz am nid ganz so sunnige Wetter hei d Gsichter vo üsne Teilnehmer aschliessend möge strahle.
Am 30. Juli hei mir üs zum alljährleche Brätle ir Waldhütte z Koppige troffe und wieder einiges zum schnause, schlürfe, snacke und gniesse kha. Dank dem schöne Summerabe und de warme Temperature si mir no bis spät id Nacht zäme khocke und hei Gschichte verzellt, frundschaftlechi Diskussione zu neue und alte Theme gführt und Zit zäme gnosse.
Am wettkampftechnisch meischt umkämpfte Ereignis vom Jahr hei mir de am 6. August dörfe biwohne. Nei, i rede nid vom Concours, sondern vom alljährleche Minigolfwettstritt z Obergerlafinge. Wie immer isches es Kopf a Kopfrenne gsi, bsundersch üsi jüngscht Teilnehmerin, d Sophie, hett einiges a tolle Golfschläg zeigt. Schlussamend hei mir all üs abr wieder einisch de Wampflers müesse gschlage gäh. Dr Beat hett im Verglich zum letscht Jahr z letschte Quäntchen Glück uf sire Site kha u dr Sieg chönne erringe, dicht gfolgt vor Christine und dr Nina. Herzlichi Gratulation a euch all. Traditionsgmäss hei mir üses Znacht aschliessend (dasmal im richtige Restaurant) bim feine Italiener chönne gniesse.
Am 13. August hett z Helferesse betreffend am Concours Burgdorf 2020 chönne stattfinde. Dasmal isches vom Ritclub Burgdorf organisiert worde und hett i dr Burgerhütte z Ersige stattfgunde. Obwohl mir naürlech es birebitzeli am Beat si Chäs hei vermisst, isch es e mega feine Grillabe worde, wo mer all hend chönne gnüsse und üs als Dankeschön für üsi Helferisätz hei chönne lah verwöhne.
Am 22.08. hett z ZKV Vereinscup Final z Lenzburg stattgfunde, und die glich Equipe (Mit Usnahm vo Lara’s Ross, dasmal hettsi de Lion VIII derbii kha) hett dert dr 11. Platz errunge. Herzlichi Gratulation.
Z 86. Luegschiesse, wo füre 28. August wär vorgseh gsi, hett leidr ufgrund vo Planigsuntersicherheit wege de Coronamassnahme müesse abgseit werde. Derfür isch abr am gliche Tag es Lueg Alternativ Fest mit villne traditionelle Element bim Schiessplatz bir Lueg organisiert worde.
Mitti September isch de au no einisch es Gländetraining z Avenches mit dr Myriam Lobsiger und dr Kuki Schärer organisiert worde.
Üses Highlight vom Jahr hett vom 24. – 26. September 2021 stattgfunde. D Pferdesporttage Burgdorf, das Jahr wieder uf de Schütz. Es isch es üsserscht erfolgrichs Turnier gsi, sowohl uf Wettkampf, als au uf organisatorischer und festwirtschaftlecher Ebeni. Z Wetter u de Bode hei bis am Sunnti super verhett. Am Sunnitg morge hani ufem Ross de hurti e kalti Duschi dörfe gniesse, zum Nami zu de 120 Prüefige isch d Sunne de abr wieder füre cho und d Hauptprüefig hett mit mängne Zueschauer chönne durchgführt werde.
I de Festwirtschaft isch das Jahr ufgrund vo Corona kei Bedienig gsi, d Lüt hei ihres Esse selber ar Theke chönne gah hole. Das hett sowohl Zuestimmig, als au Ablehnig hervorggrüeft. Für d Helfer isches so abr sicher entspannter gsi und für Zuerschauer sicherer.
Au d Bar isch das Jahr e chli umgstaltet gsi, mir hei se dasmal bim Birwage ufbaut. Dür die offnigi Location hei sech au e hufe uswertigi Lüt azoge gfüehlt und mir hei bis töif id nacht chönne usschenke. Alles in allem e wunderbare Alass.
Bsundersch hervorzhebe isch, dass üse Vereinspräsident dr Matthias Kunz mitem Inschi vom Ulmehof CH d Hauptprüefig über 125 cm hett chönne gwinne. Bim Equipespringe hei hingege d Sophie Wampfler mit Cadiz d'Aveline CH und Sara Gloor mit Lancaster von Hof CH Vollgas gäh und dr 3. Platz erritte.
Am 16. Oktober hett z ZKV Weekend stattgfunde. Üsi Dressurequipe hett übere Summer enorm intensiv trainiert und sech uf d ZKV Quadrilleprüefig vorbereitet. Fasch wärs no zunem Unglück cho, will der jewils ander z Gfüehl hett kha d Prüefig sig scho gnennt worde und mir mit Schreck hei festgstellt, dass üsi Equipe kurz vorem Wucheend no gar nid uf dr Startliste steit. Z Concourssekretariat hett zum Glück viel verständnis für üsi Situation kha und nomal es Aug zuedrückt. U das hett sech glohnt! Ganz herzlichi Gratulation zum 5. Rang!
Stephanie Hartmann uf dr Lady Gaga
Sabrina Kunz ufem Corlion von Hof CH
Sophie Wampfler uf dr Cadiz d'Aveline CH
Nina Gloor ufem Peron II
Am 30. Oktober hei mir de Vereinsplatz ufgrumt u füre Winter grüschtet, damit mir im Früehlig uf gsundem Bode u mit pflegtem Material i die neui Trainingssaison chöi starte.
Am 31. Oktober hett üsi interni Vereinsprüefig in Rumendinge stattgfunde, womer jedes Jahr mitem Ritclub Burgdorf organisiere. D Teilnähmer hei sech in Dressur und Springprüefige verschiedniger Kategorie gmesse. Das Jahr hei mir extra e neui Kategorie für Springistieger abote, womer bsundersch wert uf eifachi Linieführig und unspektakuläri Sprüng ohni Unterbautli gleit hei, damit au unerfahreni Ross und / oder unerfahreni Riter miteme guete Gfüehl de Parcours hei chönne absolviere. Aschliessend hetts es feins Znacht gäh, wo vo Riter, Begleiter und Hefler glichermasse gnosse worde isch.
Am 10. November hett z nöchschte sportleche Highlight mitem Keggle im Rudswildbad stattgfunde. Au derte hett Familie Wampfler erneut sportlechi Finesse bewiese und sich mit dr Christine uf Platz 1 und dr Sophie uf Platz 2 ufs Podest kämpft. Uf Platz 3 hei mir erneut d Nina. Herzlichi Gratulation.
Im November hett de au z nöchscht Gymnastiktraining mitem Sämu chönne starte.
Am 11. Dezember hei mir no ganz spontan e Reis zum CHI Genève organisiert und hei dermit no eim vo de leschte Grossevents vor de witläufige Schliessige wege Corona chönne biwohne. Mir hei üs am Samstig Morge z Kirchberg ufem Gmeindparkplatz troffe und hei guetzlischnausend üsi Carreis uf Genf gstartet. Nachdem mir dr Igang hei gfunde, simer flugs i dr erschte Pause nach de morgendleche Springprüefig no chli gah shoppe, bervor mer üs de z vielsitige Programm z Gmüet hei gführt. Nebe Jagdspringe, Fahrturnier, Liechtershows, Freiarbeit mit ere ganze Pferdeherde und de grosse Springprüefige isch üs de Adrenalinspiegel nie z töif gsunke. Zwische inne hei mir üs geng mit feine stärkige us dr Vielsitige kulinarische Agebot z Genf chönne lah verwöhne. Sehr müed und doch sportlech selber neu motiviert hei mir de dr Heiweg chönne atrete. Uf dr Rückfahrt hei de ämu all schön pfuserlet und so gnue schlaf ufgholt, um selber sicher de endgültig Heiweg z finde.
Am 15. Dezember hett üsi liebi Sonja bi sich daheime wieder e Chlousähöck für üs orgnaisiert. Ihre bliebt herzerwermend Glüehwii und Punsch sind am warm entfachte Füür vo allne sehr gnosse worde. Derzue hei mir feine, no warme Zopf, würzigi Würscht, Wiehnachtssnacks u feine Kueche chönne schnause. Mercii viel Mal Sonja!
Dadermit simer eventtechnisch scho am End vo dem Vereinsjahr acho und hei üs hütt a dere Hauptversammlig troffe. I möchte mi jiz schomal im Name vom Vorstand für eui Truei, eui Mithilf und die wunderbari Zit bedanke, womer das Jahr wieder zäme hei chönne verbringe. Obwohl mir grad afangs Jahr veiechli Geduld hei müesse ha, heit dir zu üs ghalte und es isch im Spätfrüehlig umso schöner gsi, all wieder chönne z treffe. Mercii euch allne!
Ganz am End bini abr doch no nid. Gern möchti mit euch no üsne Vereinsmitglieder gratuliere, wo das Jahr i de ZKV Wettkämpf für üse Verein a Start si gange und im Name vo üsem Verein tolli Resultat hei mit hei bracht. Somit hei mir vo allne ZKV Vereine dr 14. Platz vo insgsamt 54 Vereine chönne belege und si einisch meh knapp ar Klassierig verbii grütscht. Ganz herzliche Gratulation und viele Dank für eue Isatz!
Kommentar schreiben